काठमाडौ । थाइल्यान्डको औपचारिक भ्रमण र बहुपक्षीय प्राविधिक तथा आर्थिक सहयोगका लागि बंगालको खाडी प्रयास (बिमस्टेक)को छैटौँ शिखर सम्मेलनमा सहभागी हुन प्रधानमन्त्री केपी ओली मंगलबार बैंकक पुगेका छन् ।
थाई समकक्षीको निमन्त्रणामा नेपालका प्रधानमन्त्रीबाट पहिलोपटक थाइल्यान्डको औपचारिक भ्रमण भएको हो ।
प्रधानमन्त्री ओलीलाई सुवर्णभूमि अन्तर्राष्ट्रिय विमानस्थलको विशिष्ट कक्षमा थाइल्यान्डका उपप्रधानमन्त्री एवं यातायातमन्त्री सुरिया जंग्राउन ग्रेङकिटदम्पती, संस्कृति तथा खेलकुदमन्त्री सोरावोङ थेनबोङदम्पती र थाइल्यान्डका लागि नेपाली राजदूत धनबहादुर वली, नेपालका लागि थाइल्यान्डका राजदूत सावापोङ सिरिसोर्नसहितले स्वागत गरेका थिए । थाई प्रधानमन्त्री पे थोङथान शिनावात्राले प्रधानमन्त्री ओलीलाई निमन्त्रणा गरेकी थिइन् ।
प्रधानमन्त्रीको भ्रमण दलमा प्रधानमन्त्रीपत्नी राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुुप्रसाद रिमाल, आर्थिक विकास सल्लाहकार डा. युवराज खतिवडा, नेपाल सरकारका मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राईलगायत सहभागी छन् ।
बुधबार नेपाल र थाइल्यान्डका प्रधानमन्त्रीबिच औपचारिक वार्ता हुनेछ । त्यसक्रममा दुई सरकारी र ६ निजी क्षेत्रबिच सहकार्यसम्बन्धी सम्झौतापत्रमा हस्ताक्षर हुनेछ । प्रधानमन्त्रीको सचिवालयका अनुसार द्विपक्षीय वार्तापछि नेपाल र थाइल्यान्डका प्रधानमन्त्रीले बुधबार संयुक्त पत्रकार सम्मेलन गर्ने कार्यक्रम छ । उनले थाइल्यान्डका नरेश महा बजिरालोङकोर्नसँग शिष्टाचारर भेट गर्नेछन् ।
प्रधानमन्त्री ओलीले बिहीबार थाइल्यान्डका प्रतिष्ठित व्यवासायीहरूसँग अन्तक्र्रिया गर्ने कार्यक्रम छ । एसियन इन्स्टिच्युट अफ टेक्नोलोजीमा आयोजित कार्यक्रमलाई उनले सम्बोधन गर्ने तथा नेपालका तर्फबाट एक लाख डलर सहयोग गर्ने कार्यक्रम पनि तय भएको छ ।
औपचारिक भ्रमण सकिएलगत्तै प्रधानमन्त्री ओलीले बिमस्टेक शिखर सम्मेलनमा सहभागिता जनाउनेछन् । प्रधानमन्त्री ओली बिहीबार साँझ बिमस्टेक शिखर सम्मेलनका नेताहरूलाई थाई प्रधानमन्त्रीद्धारा आयोजित औपचारिक रात्रिभोजमा सहभागी हुनेछन् । उनी शुक्रबार बिमेस्टक शिखर सम्मेलनमा सहभागी हुनेछन् । त्यही दिन प्रधानमन्त्री ओलीसहित शीर्ष नेताहरूले सम्बोधन गर्ने कार्यक्रम छ ।
बिमस्टेक नेताहरूबिच मेरिटाइम ट्रान्सपोर्ट कोअपरेसन अग्रिमेन्टमा हस्ताक्षर हुने कार्यक्रम रहेको ओलीले संसद्लाई जानकारी दिएका छन् । शुक्रबार साँझ बैंककस्थित नेपाली राजदूतावासमा आयोजित रात्रिभोजमा सहभागी भएर प्रधानमन्त्री ओली शनिबार स्वदेश फर्किनेछन् ।
