दुबई । क्षेत्री समाज नेपाल युएई शाखाको प्रथम अधिवेशन सम्पन्न भएको छ । अधिवेशनले कृष्णबहादुर ढकाल क्षेत्रीको अध्यक्षतामा नयाँ कार्यसमिति चयन गरेको छ ।
निर्वाचन समिति संयोजक दीपक खड्काका अनुसार उपाध्यक्षमा सुदिप कार्की र दीपक राउत चयन भएका छन् । महिला उपाध्यक्षमा हिरा केसी, सचिवमा भीम केसी, सहसचिवमा टेस्रो खड्का, कोषाध्यक्षमा होमबहादुर महत तथा सहकोषाध्यक्षमा कमल केसी निर्वाचित भएका छन् । समितिमा अन्य सदस्यसहित २१ सदस्यीय कार्यसमिति गठन गरिएको जनाइएको छ ।
अधिवेशनमा नेपालबाट जुममार्फत सहभागी भएका क्षेत्री समाज नेपालका केन्द्रीय अध्यक्ष रिवबहादुर थापा, अन्तर्राष्ट्रिय प्रवास इन्चार्ज हंसराज ढकाललगायत केन्द्रीय प्रतिनिधिहरूको विशेष उपस्थिति रहेको थियो ।
कार्यक्रमलाई सम्बोधन गर्दै प्रमुख अतिथि तथा क्षेत्री समाज नेपालका केन्द्रीय अध्यक्ष रिवबहादुर थापाले नवनिर्वाचित कार्यसमितिलाई बधाई तथा सफल कार्यकालको शुभकामना व्यक्त गरे । उनले प्रवासमा रहेका सम्पूर्ण खस क्षेत्री समुदायलाई संस्थामा आबद्ध गराउँदै समुदायको संस्कार र संस्कृतिको संरक्षणमा सक्रिय भूमिका खेल्न आग्रह गरे ।
अधिवेशनले प्रवासमा रहेका क्षेत्री समुदायबीच संगठनात्मक एकता, सहकार्य तथा सामाजिक समन्वयलाई थप सुदृढ बनाउने विश्वास लिइएको छ ।
