रुपन्देही – देवदहमा मंगल पुष्करिणी दह धार्मिक महोत्सव सुरु भएको छ। बिहीबार एक समारोहबीच दहमा महापरित्राण पाठ गर्दै महोत्सवको औपचारिक उद्घाटन गरिएको हो। देवदह–९ का वडा अध्यक्ष तथा महोत्सव मूल आयोजक समिति संयोजक मोहन जिसीका अनुसार अन्तर्राष्ट्रिय भिक्षुणी विहारबाट मंगल पुष्करिणी दहसम्म कलश यात्रा निकालिएको थियो।
महोत्सवको पहिलो दिन अखिल नेपाल भिक्षु महासंघका पूर्व केन्द्रीय अध्यक्ष तथा अन्तर्राष्ट्रिय बौद्ध समाजका अध्यक्ष भिक्षु मैत्री महास्थवीरको नेतृत्वमा महापरित्राण पाठ सम्पन्न भयो। कार्यक्रममा लुम्बिनी विकास कोषका कोषाध्यक्ष सिद्धिचरण भट्टराई, देवदह नगरपालिकाका प्रमुख ध्रुवप्रसाद खरेल, उपप्रमुख विद्यालक्ष्मी गुरुङ, पूर्व नगर प्रमुख हिरा बहादुर खत्री, अन्तर्राष्ट्रिय भिक्षुणी महासंघकी अध्यक्ष न्यानवती गुरुमा लगायतको उपस्थिति थियो।
भिक्षु मैत्री महास्थवीरले देवदह क्षेत्रको समग्र विकास आवश्यक रहेको बताउँदै, बौद्धकालीन ऐतिहासिक स्थलहरूको संरक्षण र प्रवर्द्धनले क्षेत्रको समृद्धि ल्याउने उल्लेख गरे। उनले देवदह, बैरिमाई, कन्यामाई, पाकरी, पण्डितपुर र रामग्रामलाई समेटेर योजनाबद्ध विकास गर्नुपर्ने धारणा राखे।
महोत्सवको कलश यात्रामा विभिन्न संघ–संस्था, आमा समूह र भूपू सैनिक कल्याणकारी समाज, मगर संघ, उज्यालो लालटिन प्रतिष्ठान लगायतले सहभागिता जनाएका थिए। उनीहरूले पानी, चिया लगायत सामग्री निःशुल्क वितरण गरेका थिए। बौद्ध परम्परा अनुसार बिहीबार महापरित्राण पाठसँगै सुरु भएको महोत्सवमा शुक्रबारदेखि श्रीमद्भागवत महापुराण सुरु हुनेछ। हिन्दू परम्पराअनुसार कलश यात्रा गरी श्रीमद्भागवत महायज्ञ प्रारम्भ गरिनेछ।
ऐतिहासिक मंगल पुष्करिणी (देवदह) को प्रचारप्रसारसहित देवदह–९ स्थित सन्दीप आधारभूत विद्यालय र छाडा चौपाया व्यवस्थापनका लागि निर्माण गरिएको गौशालालाई सहयोग जुटाउन महोत्सव आयोजना गरिएको वडा सदस्य कृष्णमाया रानाले जानकारी दिइन्।
