Category: समाचार

दिपक खाती, नवलपरासी । सुनवल नगरपालिका ७, अस्नैया स्थित  ज्योति माध्यमिक विद्यालयमा ‘मेरो विद्यालय मेरो दायित्व’ कार्यक्रम सम्पन्न भएको छ।

लुम्बिनी प्रदेश सरकार अन्तर्गत सञ्चालित उक्त कार्यक्रमकालागि सुनवल नगरपालिकाभित्र ज्योति माध्यमिक विद्यालय मात्रै छनोटमा परेको विद्यालयले जनाएको छ।

विद्यालय व्यवस्थापन समितिका अध्यक्ष तेजबहादुर गुरुङको अध्यक्षतामा भएको कार्यक्रममा वडा नम्बर ७ का अध्यक्ष नारायण आचार्य प्रमुख अतिथि रहेका थिए। नगर शिक्षा अधिकृत पशुपति भट्टराई विशिष्ट अतिथिका रूपमा सहभागी थिए भने कार्यक्रमको सञ्चालन शिक्षक पप्पु पाण्डे मगरले गरेका थिए।

कार्यक्रममा पूर्वविद्यार्थी दुर्गा सोर्खाली, सुदिप खनाल, शङ्कर पुरी लगायतको उपस्थिति रहेको थियो।

कार्यक्रममा वक्ताहरूले विद्यार्थीको शैक्षिक तथा नैतिक विकासमा अभिभावकको भूमिका महत्वपूर्ण हुने बताएका थिए। विद्यालय, शिक्षक र अभिभावकबीचको सहकार्य बलियो भए मात्रै विद्यार्थीलाई उत्कृष्ट बनाउन सकिने धारणा उनीहरूले राखेका थिए।

अभिभावकमुखी चेतना अभिवृद्धि गर्दै विद्यालयप्रति अपनत्व बढाउने उद्देश्यले कार्यक्रम आयोजना गरिएको विद्यालयले जनाएको छ।

संयुक्त अरब इमिरेट्समा रहेका पाल्पालीहरूको साझा संस्था पाल्पाली समाज युएईले आफ्नो ११औँ वार्षिक उत्सव सम्पन्न गरेको छ।

सन् २०१४ (वि.सं. २०७१) मा स्थापना भएको समाजले बरदुबईमा वार्षिकोत्सव आयोजना गरेको हो। कार्यक्रममा समाजका अध्यक्ष कैलाश अर्यालको अध्यक्षता तथा नेपाली समाज युएईका अध्यक्ष राम मोक्तानको प्रमुख आतिथ्यता रहेको थियो।

समारोहमा संस्थाको आर्थिक तथा संगठनात्मक प्रतिवेदन प्रस्तुत गरिएको थियो भने प्रवासमा रहेर विभिन्न क्षेत्रमा सफलता हासिल गरेका पाल्पाली नागरिकलाई सम्मानसमेत गरिएको थियो।

कार्यक्रमलाई सम्बोधन गर्दै प्रमुख अतिथि राम मोक्तानले पाल्पाली समुदायको आपसी सद्भाव, सहयोगी भावना र सक्रियताले पाल्पाको पहिचानलाई प्रवासमा अझ मजबुत बनाएको बताए। उनले आगामी दिनमा नेपाली समाज युएई र पाल्पाली समाज युएईबीच सहकार्यलाई थप सुदृढ बनाइने धारणा व्यक्त गरे।

कार्यक्रममा दुबईलाई कर्मथलो बनाएका लोक तथा दोहोरी गायक अर्जुन न्यौपाने तथा निरुता गैरेले सांगीतिक प्रस्तुति दिएका थिए।

समारोहमा नेपाली समाज युएईका पार्षद अध्यक्ष कमल गिरी, लुम्बिनी प्रदेश समाज युएईका अध्यक्ष नारायणप्रसाद अधिकारी, पाल्पाली समाज युएईका संरक्षक तथा सल्लाहकार कृष्णप्रसाद आचार्य, खुमबहादुर आले, ओमकुमारी खाँण, बेदप्रसाद अर्याललगायत विभिन्न प्रदेश, जिल्ला तथा नगरस्तरीय संस्थाका प्रतिनिधिहरूको उपस्थिति रहेको थियो।

कार्यक्रम संस्थाका वरिष्ठ उपाध्यक्ष कृष्णप्रसाद तिमिल्सिनाको स्वागत मन्तव्य तथा महासचिव खुमप्रसाद न्यौपानेको सञ्चालनमा सम्पन्न भएको थियो।

राष्ट्रिय स्वतन्त्र पार्टीकी समानुपातिक सांसद श्रद्धा कुंवरले सामाजिक सञ्जाल फेसबुकमा आफ्ना पोस्टहरू बुस्ट गर्न डलर खर्च गरेको देखिएपछि आलोचना सुरु भएको छ।

पछिल्लो समय उनका पोस्टहरू ‘स्पोनसर’ रूपमा प्रयोगकर्ताको फिडमा देखिन थालेका छन्। सार्वजनिक पदमा बसेको व्यक्तिले आफ्ना गतिविधि र विचार सामाजिक सञ्जालमार्फत सार्वजनिक गर्नु सामान्य भए पनि, पहुँच बढाउन पैसा खर्च गर्नु कत्तिको उचित हो भन्ने प्रश्न उठेको छ।

कतिपयले यसलाई कामभन्दा प्रचारलाई प्राथमिकता दिने प्रवृत्ति भन्दै टिप्पणी गरेका छन्। “काम राम्रो भए बुस्ट नगर्दा पनि जनसमर्थन आफैं बढ्छ,” भन्ने प्रतिक्रिया सामाजिक सञ्जालमै देखिन थालेको छ।

राष्ट्रिय स्वतन्त्र पार्टी (रास्वपा) का देवदह नगर सभापति किरण भण्डारीले देवदह आदर्श बहुमुखी क्याम्पसको सञ्चालक समितिबाट राजीनामा दिएका छन्।

भण्डारीले सामाजिक सञ्जालमार्फत विद्यालय तथा क्याम्पसहरूमा राजनीतिक हस्तक्षेप हुन नहुने जनाउँदै आफूले उक्त समितिबाट राजीनामा दिएको जानकारी दिएका हुन्।

यसअघि प्रकाशित समाचारमा किरण भण्डारीले पार्टी पदबाट राजीनामा दिएको भनी उल्लेख गरिएकोमा तथ्यगत त्रुटि भएकोले सच्याइएको छ। – सम्पादक

सुनवल । “विद्यालय पढ्ने ठाउँ मात्र होइन, काम गरेर सिक्ने प्रयोगशाला पनि हो,” यो भनाइलाई व्यवहारमा उतारेको छ सुनवल नगरपालिका–७ स्थित जनज्योति आधारभूत विद्यालयले। विद्यालयको परिसरमा विद्यार्थीहरूले उत्पादन गरेका घिरौंला, बोडी, करेला, फर्सी, टमाटर र मकै अहिले दिवा खाजाको परिकार बन्दै आएका छन्।
किताबी ज्ञान मात्र हैन व्यहारिक शिक्षालाइ जोड दिने विद्ध्यालाको नीति अहिले नियमित अभ्यास बनेको छ। विद्यार्थीहरू पाठ्यपुस्तकको पढाइसँगै खेतबारीको व्यवहारिक ज्ञानमा पनि रमाइरहेका छन्।
“विद्यार्थीले आज मात्रै दोस्रो छाकमा घिरौंला खाए। पहिले टमाटर फल्यो, तर अहिले सकिएको छ। अहिले चाहिँ बोडी मात्र बाँकी छ,” विद्यालयका शिक्षक राजेश तिवारीले जानकारी दिए। “फर्सीका मुन्टाहरू चाहिँ जाउलोमा हालेर खुवाउने गरेका छौं,” उनले थपे। उनका अनुसार मकैको पहिलो लट भाँचिसकिएको छ भने दोस्रो लटको तयारी भइरहेको छ। पहिले गोभी र बन्दा पनि फलाएर विद्यार्थीले दिवा खाजा खाएको उनले बताए।
विद्ध्यालयमा करेसा बारी सुनवल नगरपालिले स्थानीय पाठेक्रममा समावेस गर्नुको साथै विद्यालयमा बजेट पनि बिनियोजन गरेको छ यसले पनि बिउ बिजन र मल खरिद लाइ सहज भएको विद्यालयकि प्रधानाध्यापक सावित्री कुमारी राना बताउँछिन् । विद्यालयमा व्यवहारिक शिक्षाको अभ्यासका रूपमा सुरु गरिएको करेसाबारी अभियानले विद्यार्थीलाई उत्पादनमा समेत अभ्यस्त बनाएको छ। केही पिरियडमा पढाइ सकेपछि विद्यार्थीहरू खुसी हुँदै करेसाबारीतिर लाग्छन्। “विद्यार्थीहरू करेसाबारीतिर जान पाउँदा रमाउँछन्।
कक्षा शिक्षक बिदामा बसेको समय, दिउँसो खाजा खाने समय र आवश्यकता परेको बेला छुट्टीको दिन विद्यार्थीहरू उत्साहित भएर विद्यालय आउँछन् । उनी दिनभरि नर्सरी र तरकारी खेतीमा रमाउँछन् ।
जनज्योति आधारभूत विद्यालयमा सञ्चालन गरिएको करेसाबारीले केवल तरकारी मात्रै फलाएको छैन, विद्यार्थीको सोच, दृष्टिकोण र सीप पनि हुर्काइदिएको छ। यस्तो व्यवहारिक अभ्यासले ग्रामीण विद्यालयमा शिक्षालाई जीवनोपयोगी बनाउन मद्दत गरेको छ ।

एजेन्सी । पञ्जाब किंग्सले इण्डियन प्रिमियर लिग (आइपिएल) २०२५ मा लगातार दोस्रो जित हासिल गरेको छ ।

मंगलवार भएको खेलमा लगातार दोस्रो जित हात पार्ने क्रममा पञ्जाबले लखनउ सुपर जायन्ट्सलाई ८ विकेटले पराजित गर्यो । लखनउले दिएको १ सय ७२ रनको लक्ष्य पञ्जाबले १६.२ ओभरमा २ विकेट गुमाएर पूरा गर्यो ।

पञ्जाबको जितमा ओपनर ओपनर प्रभसिमरन सिंहले ३४ बलमा ९ चौका र ३ छक्काको सहयोगमा सर्वाधिक ६९ रन जोडे । प्रभसिमरनले दोस्रो विकेटका लागि कप्तान श्रेयस ऐरसँग मिलेर ८४ रनको साझेदारी गरे । कप्तान ऐर ३० बलमा ३ चौका र ४ छक्काको सहयोगमा ५२ रनमा नट आउट रहे ।

तेस्रो विकेटका लागि कप्तान ऐर र नेहाल बढेराले ६७ रनको विजयी साझेदारी गरे । नेहालले २५ बलमा ३ चौका र ४ छक्काको सहयोगमा ४३ रनमा नट आउट रहे । ओपनर प्रियासं आर्य ८ रनमा आउट भए । लखनउका लागि दुवै सफलता दिग्वेश राठीले दिलाए ।

त्यसअघि लखनउस्थित एकाना अन्तर्राष्ट्रिय क्रिकेट स्टेडियममा टस हारेर ब्याटिङको निम्तो पाएको लखनउले निर्धारित २० ओभरमा ७ विकेट गुमाएर १ सय ७१ रनको योगफल तयार गरेको थियो ।

लखनउका लागि निकोलस पुरनले ३० बलमा ५ चौका र २ छक्काको सहयोगमा सर्वाधिक ४४ रन जोडेका थिए । आयुष बदोनीले ३३ बलमा १ चौका र ३ छक्काको सहयोगमा ४१ रन बनाएका थिए ।

अब्दुल समाद १२ बलमा २ चौका र २ छक्काको सहयोगमा २७ रनमा आउट भएका थिए । ओपनर एडेन मारक्रम १८ बलमा २८, डेबिड मिलर १८ बलमा १९ तथा कप्तान ऋषभ पन्त २ रनमा आउट भएका थिए ।

पञ्जाबका लागि अर्शदिप सिंहले ३ तथा लकि फर्गुसन, ग्लेन म्याक्सवेल, मार्को यानसन र युजभेन्द्र चहलले समान १ विकेट लिएका थिए ।

लगातार दोस्रो जितका साथ पञ्जाब ४ अंकका साथ तालिकाको दोस्रो स्थानमा उक्लिएको छ । पञ्जाबले पहिलो खेलमा गुजरात टाइटन्सलाई उसकै मैदान अहमदाबादमा पराजित गरेको थियो ।

यस्तै, पराजित लखनउले तेस्रो खेलमा दोस्रो हार बेहोरेको छ । लखनउ ३ खेलमा २ अंकका साथ तालिकाको छैठौं स्थानमा छ । दिल्ली क्यापिटल्ससँगको पहिलो खेल गुमाएको लखनउले दोस्रोमा सनराइजर्स हैदराबादलाई पराजित गरेको थियो ।

काठमाडौं । जल तथा मौसम विज्ञान विभाग मौसम पूर्वानुमान महाशाखाले हाल देशमा पश्चिमी तथा स्थानीय वायुको आंशिक प्रभाव रहेको जनाएको छ ।

महाशाखाका अनुसार अहिले कोशी, गण्डकी र कर्णाली प्रदेशको पहाडी भूभागमा आंशिक बदली रही बाँकी भूभागमा मौसम मुख्यतया सफा रहेको छ ।

आज दिउँसो कोशी, मधेश, बागमती, गण्डकी र लुम्बिनी प्रदेशमा आंशिक बदली रही बाँकी भूभागमा आंशिक बदलीदेखि मौसम मुख्यतया सफा रहने छ ।

कोशी र गण्डकी प्रदेशका उच्च पहाडी तथा हिमाली भूभागका एकदुई स्थानमा हल्का हिमपातको सम्भावना रहेको छ ।

आज राति कोशी, मधेश, बागमती, गण्डकी र लुम्बिनी प्रदेशमा आंशिक बदली रही बाँकी भूभागमा आंशिक बदलीदेखि मौसम मुख्यतया सफा रहने छ ।

आज सूर्योदय बिहान ५ बजेर ५३ मिनेटमा भयो भने सूर्यास्त साँझ ६ बजेर २२ मिनेटमा हुनेछ ।