Author: खोज प्रेस

काठमाडौं । पाँच खेलको श्रृंखलाको अन्तिम खेलमा नेपालले वेस्ट इन्डिज ‘ए’ माथि ६ विकेटको जीत हात पारेको छ ।

वेस्ट इन्डिज ‘ए’ले दिएको १७३ रनको लक्ष्य नेपालले ७ बल बाँकी छँदै ४ विकेटको क्षतिमा पूरा गरेको हो ।

काठमाडौं । अन्तिम टी–२० खेलमा वेष्ट इन्डिज ‘ए’ ले नेपाललाई १ सय ७३ रनको लक्ष्य दिएको छ ।

टीयु क्रिकेट मैदानमा टस जितेर पहिला ब्याटिङ गरेको वेष्ट इन्डिज ‘ए’ ले निर्धारित २० ओभरमा ७ विकेट गुमाएर १७२ रन बनाएको हो ।

वेष्ट इन्डिज ‘ए’ का लागि एलिक अथान्जले सर्वाधिक रन बनाए । अथान्जे ३५ रनमा अविजित रहे । रोस्टन चासेले ३३ र जोनसन चाल्र्सले २४ रन बनाएर आउट भए । फाबिएन एलेन ३३ रनमा अविजित रहे ।

बलिङमा नेपालका सागर ढकाल र सोमपाल कामीले ३ – ३ विकेट लिए । सोमपालले एकैओभरमा दुई विकेट लिएको थियो ।
अभिनाश बोहोराले एक विकेट लिए । वेष्ट इन्डिज ‘ए’ले सिरिजको उपाधि जितिसकेको छ ।

मकवानपुर । बागमती प्रदेश संस्कृति, पर्यटन तथा सहकारीमन्त्री शैलेन्द्रमान बज्राचार्यले प्रदेशमा अब सरकारी कामकाजको नेवारी र तामाङ भाषालाई यही वैशाख २४ गतेदेखि व्यावहारिकरुपमा प्रयोगमा ल्याइने बताएका छन् ।

मन्त्री बज्राचार्यले आज सङ्क्षिप्त कुरा गर्दै वैशाख २४ गते बिहान ९ बजे काठमाडौँको वसन्तपुरमा प्रधानमन्त्री पुष्पकमल दाहाल ‘प्रचण्ड’ले उक्त दुवै भाषा सबै सरकारी कार्यालयमा प्रयोगमा ल्याइने कार्यक्रमको समुद्घाटन गर्ने जानकारी दिए । उनले काठमाडौँको वसन्तपुरबाट सोही दिनको बिहान ७ बजे विभिन्न वेषभूषा र झाँक्रीसहित र्यालीले काठमाडौँ नगरको परिक्रममा गर्ने पनि उल्लेख गरे ।

यसैगरी प्रदेश सरकारले प्रदेशमा नेवाः (नेपाल) तामाङ भाषा सरकारी कामकाजको भाषा प्रयोगमा ल्याइएको खुसियालीमा सो दिन प्रदेशभर सार्वजनिक बिदा दिने निर्णय गरिएको प्रदेश सरकारका प्रवक्ता एवं आन्तरिक मामिला तथा कानुनीमन्त्री गङ्गानारायण श्रेष्ठले बताए ।

उक्त भाषा प्रयोगमा ल्याइएको खुसियालीमा हुने कार्यक्रम भव्यरुपमा सम्पन्न गर्न संस्कृतिमन्त्री बज्राचार्यको अध्यक्षतामा तीन सय पाँच सदस्यीय आयोजक समिति बनाइएको छ । बागमती प्रदेशसभाको केही महिनाअघि बसेको बैठकले प्रदेशमा सरकारी कामकाजको भाषाका रुपमा नेवारी र तामाङ भाषाको विधेयक पारित गरिएको प्रदेशसभाका प्रमुख सचिव कृष्णहरि खड्काले जानकारी दिए ।

म्याग्दी । म्याग्दीको मङ्गला गाउँपालिका–२ ¥यालेखोर र भाइवाङमा ९२ लाख रुपैयाँको लगानीमा ‘एक घर, एक धारा’ अभियानअन्तर्गत खानेपानी आयोजना निर्माण भएको छ ।

नेपाल स्वास्थ्यका लागि पानी (नेवा) संस्था, मङ्गला गाउँपालिका र उपभोक्ताको ९२ लाख २४ हजार नौ सय ८७ रुपैयाँका लागतमा निर्माण भएको आयोजनाबाट एक सय घरपरिवार लाभान्वित भएका छन् ।

उपभोक्ता समितिका अध्यक्ष तेजिन्द्र आचार्यले सय घर र विद्यालय, सामुदायिक भवन तथा खेलमैदानमा थप आठ वटा निजी धारा जोडेर खानेपानी वितरण गरिएको जानकारी दिए ।

मुहान र वितरण पाइपलाइनलाई व्यवस्थित गरेपछि सीमित स्रोतले पनि सबैले सहजरुपमा खानेपानी उपभोग गर्न पाएका अध्यक्ष आचार्यले बताए ।

नेवा संस्थाको ३८ लाख ७१ लाख ३०७, मङ्गला गाउँपालिकाको २७ लाख अनुदान र उपभोक्ताको २२ लाख ७८ हजार ४६८ श्रमदानबाट आयोजना निर्माण भएको उपभोक्ता समितिले जनाएको छ ।

अध्यक्ष आचार्यका अनुसार उपभोक्ताको श्रमदानका अलावा थप तीन लाख ७५ हजार २१२ रुपैयाँ नगद सङ्कलन गरिएको थियो ।

त्रिभुवन मङ्गला मावि र ¥यालेखोर बस्तीका लागि पहिराको मुहानबाट पानी तानेर र भाइवाङ बस्तीमा पँधेराको मुहानको वितरण गरिएको हो ।

नेवा संस्थाको सहयोगमा मङ्गला गाउँपालिकाको थप दुई ठाउँमा खानेपानी आयोजना निर्माणाधीन छन् ।

संस्थाका प्राविधिक गोर्खबहादुर शाहीले खानीगाउँ र हिदीमा निर्माणाधीन आयोजना अन्तिम चरणमा रहेको बताए । खानीगाउँका ३७ घर, एक विद्यालय र हिदीका ६४ घरमा निजी धारासहितको खानेपानी वितरण गरिने उनको भनाइ छ ।

काठमाडौं । नेपालले वेस्ट इन्डिज ‘ए’ सँगको टी–२० सिरिजको अन्तिम खेल आज खेल्दैछ । उक्त खेल टीयु क्रिकेट मैदानमा दिउँसो सवा १२ बजेबाट सुरु हुनेछ ।

बिहीबार भएको सिरिजको चौथो खेलमा बिहीबार २८ रनको जित हात पार्दै वेस्ट इन्डिज ए शृंखला जित्न सफल भयो ।

त्यसअघि बुधबार भएको तेस्रो खेलमा वेस्ट इन्डिज ‘ए’ ले नेपाललाई ७६ पराजित गरेको थियो । त्यस्तै आइतबार भएको दोस्रो खेलमा नेपाल वेष्ट इन्डिज ‘ए’ सँग १० रनले पराजित भएको थियो ।

शनिबार भएको पहिलो खेलमा नेपालले वेस्ट इन्डिज ‘ए’ लाई ४ विकेटले पराजित गरेको थियो । पाँच खेल खेल्दा नेपालले एक खेल मात्र जितेको छ भने बाँकी वेस्ट इन्डिज ‘ए’ तीन खेल जित्दै श्रृंखला जित्न सफल भएको छ ।

टी–२० विश्वकपको तयारीमा रहेको नेपालले वेस्ट इन्डिज ‘ए’ सँग घरेलु मैदानमा ५ टी२० खेल खेलिरहेको हो । घरेलु मैदानमा पाँच खेल खेलिसकेपछि नेपाली टोली वेस्ट इन्डिज प्रस्थान गर्ने तालिका रहेको क्यानले जनाएको छ । क्यानले विश्वकप खेल्ने नेपाली टोलीलाई विदाई गरिसकेको छ ।

रुपन्देही । नेकपा (एकीकृत समाजवादी) का महासचिव घनश्याम भुसालले नेकपा एमालेलाई केपी ओलीले अझै गलत बाटोमा लगिरहेको बताएका छन् ।

उनले ओलीले जति सकिन्छ बल गरेर एमालेलाई नर्कतिर धकेल्दै लगेको गम्भीर आरोप लगाए ।

नेकपा (एस) जिल्ला कमिटी रुपन्देहीले शुक्रवार भैरहवामा आयोजना गरेको पार्टी प्रवेश तथा प्रशिक्षण कार्यक्रमलाई सम्बोधन गर्दै महासचिव भुसालले यस्तो बताएका हुन् ।

उनले भने, ‘ओलीजी कसैलाई गन्ने मान्छे होइन । अहिले उहाँ थाक्नुभएको छ र आएर सँगै जाऔँ भन्नुभएको छ । हामीले शंकाको सुविधा दिएका छौँ एमालेलाई र अहिले हामी एउटै गठबन्धनमा छौँ ।’

कुनै दिन नेकपा एमाले र एसबीच तथा नेकपा (माओवादी केन्द्र) बीच एकता हुन सक्ने उनले बताए ।

उनले भने, ‘अहिले हेर्दा खेरी के देखिन्छ भने त्यहाँभित्र ओली गुट बलियो रहेसम्म एकताको कुनै सम्भावना छैन, देखिँदैन । त्यो बेकार कुरा हो ।’

पूर्वमन्त्री समेत रहेका भुसालले ओलीले ध्वस्त पारेको आन्दोलनलाई कसरी उठाउन सकिन्छ भनेर प्रयत्न गरेको बेलामा ओलीको कुनै कुराले आफूहरूलाई प्रभावित नपार्ने दाबी गरे ।

उनले भने, ‘अब जाने भनेको हिजो जे बिग्रँदै थियो, त्यो बनाउने हो ।’ सिद्धान्त, विचार र तरिकाका हिसाबले नेकपा एमाले मृत जस्तो भएको उनको भनाइ छ । उनले भने, एक जना माथि ट्याउँट्याउँ बोल्नुहुन्छ, ओलीजी हुनुहुन्छ, अरू कोही बोल्दैन । एमालेमा कोही चल्दै चल्दैन ।’

नेता भुसालले एमालेमा माथिदेखि तलसम्म हिजै आफूहरूले बनाएको छोडेको संगठन भएको दाबी गरे । नेपालको संसदमा सबैभन्दा शक्तिशाली केपी ओली भएको तर, शक्तिशाली प्रधानमन्त्री आफैले संसद भत्काएको उनले बताए ।

‘कम्युनिष्ट पार्टीको सबैभन्दा ठूलो उपस्थिति भएको संसद उहाँले भत्काएपछि त्यसमा विचार हराउँदै गयो ।तर, पनि एमाले एउटा शक्ति हो, किनभने एमालेसँग संगठन छ,’ भुसालले भने ।

उनले मुलुकमा बेरोजगारी तथा धनी र गरिबबीचको खाडल अझ बढेको बताए । मुलुकका ५० लाख युवा विदेश गएर काम गर्नुपरेको परिस्थिति रहेको भुसालको भनाइ छ ।

नेपालको संविधानमा धेरै राम्रो अधिकार लेखिएको र अब मुलुकमा रोजगारी सिर्जना तथा सुशासन कायम गर्नुपर्नेमा उनले जोड दिए । उनले भने, ‘एक वर्ष वरिपरि नेकपा (एस) कसैले हेप्न नसक्ने शक्ति र प्रमुख पार्टीको रूपमा अघि बढ्छ ।’

त्यस्तै पार्टीका सचिव तथा लुम्बिनी प्रदेश इन्चार्ज हरि पराजुलीले एमालेलाई शक्तिशाली बनाउन विगतमा मिहिनेत गरे पनि पार्टीले वाचा पुरा नगरेपछि विद्रोह गरिएको बताए । उनले जनताको समस्या समाधान गर्नका लागि नै नेकपा (एस) पार्टी ल्याइएको दाबी गरे ।

नेकपा (एस) लुम्बिनी प्रदेश अध्यक्ष तथा पूर्वमन्त्री सोम प्रसाद पाण्डेले विद्रोह कुनै रहरले नगरिएको बताए । उनले एमालेबाट विद्रोह गरेर संविधान बचाएको दाबी गरे ।

पार्टीका केन्द्रीय सदस्य बाबुलाल यादवले देशको परिस्थिति अत्यन्तै जटिल भएको बताए ।

कार्यक्रममा नेकपा (एकीकृत समाजवादी) रुपन्देहीका कार्यवाहक अध्यक्ष श्रीराम यादव, उपाध्यक्ष चिन बहादुर गुरुङ, सचिव टंक पौडेललगायतले बोलेका थिए ।

कार्यक्रममा नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी, जनता समाजवादी पार्टी, नेपाललगायत विभिन्न पार्टी परित्याग गरी ३ सय बढी नेता–कार्यकर्ता नेकपा (एकीकृत समाजवादी) मा प्रवेश गरेका थिए ।

काठमाडौं । हाल देशमा पश्चिमी वायु र स्थानीय वायुको आंशिक प्रभाव कायम रहेको जनाउँदै जल तथा मौसम विज्ञान विभागले अहिले मुलुकका पहाडी भूभागमा आंशिक बदली रही बाँकी भागमा मौसम सफा रहेको बताएको छ ।

विभागका अनुसार आज दिउँसो लुम्बिनी, गण्डकी, कर्णाली र सुदूरपश्चिम प्रदेशमा आंशिक बदली भई बाँकी भागमा आंशिक मौसम सफा रहने छ भने राति सुदूरपश्चिम, कर्णाली र गण्डकी प्रदेशका पहाडी भागमा साधारणतया बदली भई बाँकी क्षेत्रमा मौसम सफा रहनेछ ।

कोशी र गण्डकी प्रदेशका केही स्थानमा हुरीबतासको सम्भावना रहेको जनाउँदै विभागले क्षेत्रमा दैनिक जनजीवनलगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने सम्भावना रहेकाले आवश्यक सतर्कता अपनाउन अनुरोध गरेको छ ।

काठमाडौं । भेल्लु बाजेका नामले सोसल मिडियामा चर्चित प्युठानका मीनबहादुर बुढाको निधन भएको छ । एक्कासि सास फेर्न गाह्रो भएपछि बिहीबार दिउँसो उनलाई जिल्ला अस्पताल प्युठानमा भर्ना गरिएको थियो ।

केहीबेरअघि उनलाई डाक्टरले मृत घोषणा गरेका उनको ज्वाइँ हिमलाल पुन मगरले बताए । युट्युबलगायत सामाजिक सञ्जालमा उनलाई भाइरल गराएका युट्युबर तेजेन्द्र परियारले भने, ‘मसहित गएर दिउँसो अस्पतालमा भर्ना गराएका हौँ । उहाँलाई सास फेर्न गाह्रो भइरहेको थियो तर बोल्नसक्ने नै हुनुहुन्थ्यो । मृत्युका बारेमा आफन्तले अरु कुरा पनि गरिरहनुभएको छ । म बहिनीको उपचारका लागि बुटवल आएको छु । भर्खरै थाहा पाएँ, बाजे बित्नुभो भनेर ।’

प्युठान नगरपालिका- ४ का बुढामगर आफ्नो बोली व्यवहारका कारण केही महिनाअघिसम्म सोसल मिडियामा चर्चित थिए । गत भदौमा उनकी ५९ वर्षीया श्रीमती बिस्ना बुढाको निधन भएको थियो । त्यसयता उनले निकै एक्लो र निराशाका कुरा गरिरहेको सोसल मिडियामा आएका भिडियोमा देख्न सकिन्थ्यो ।

काठमाडौं । वेस्ट इन्डिज एले नेपालविरुद्ध जारी ५ खेलको टी-२० शृंखला जित्ने निश्चित गरेको छ । चौथो खेलमा बिहीबार २८ रनको जित हात पार्दै वेस्ट इन्डिज ए शृंखला जित्न सफल भयो ।

पहिलो खेल हारेको वेस्ट इन्डिज एले त्यसपछि लगातार तीन खेल जितेर अन्तिम खेल बाँकी रहँदै शृंखला जित्ने पक्का गरेको हो । वेस्ट इन्डिज एले चौथो खेलमा २१० रनको विशाल लक्ष्य दिएको थियो। नेपालले निर्धारित २० ओभरमा सबै विकेट गुमाएर १८१ रन जोड्यो ।

नेपालका लागि कप्तान रोहित पौडेलले सर्वाधिक ८२ रन जोडे । दीपेन्द्रसिंह ऐरी १९, सन्दीप जोरा १९, कुशल भुर्तेल १ र कुशल मल्ल ४ रन जोडेर आउट भए ।आसिफ शेखले खाता खोल्न सकेनन् । अविनाश बोहराले १७ र सोमपाल कामीले १० रन बनाए ।

रोहितले चौथो विकेटका लागि सन्दीप जोरासँग ४० र पाचौँ विकेटका लागि दीपेन्द्रसिंह ऐरीसँग ५३ रनको साझेदारी गरे। नेपालले १४ औँ ओभरको तेस्रो बलमा कप्तान रोहितलाई पाचौँ विकेटका रुपमा गुमाएपछि लगातार दबाबमा आएको थियो। शृंखलाअन्तर्गत अन्तिम खेल शनिबार हुने छ ।

काठमाडौं । नेपालले जितका लागि २१० रनको विजय लक्ष्य पाएको छ । पहिले ब्याटिङ गरेको वेस्ट इन्डिज ए ले निर्धारित २० ओभरमा ३ विकेट गुमाउँदै २०९ रन बनाएपछि नेपालले २१० रनको लक्ष्य पाएको हो ।

वेस्ट इन्डिजका लागि आन्द्रे फ्लेचरले नटआउट ८४ रन जोडे । उनले ५४ बलको सामना गरे । त्यस्तै फाबिअन एलेन ३३ रनमा नटआउट रहे । त्यस्तै एलिक एथान्ज ५ रन बनाएर आउट हुँदा जोनसन चार्ल्सले ५८ रनको अर्धशतकीय पारी खेलेका थिए । त्यस्तै केइसी कार्टीले ४ रन जोडे ।

नेपालका लागि कुशल भुर्तेलले २ तथा प्रतिश जिसीले १/१ विकेट लिए ।